أول كلام

الحمد لله ان ربنا وفقني و عملت مدونه و سمتها كمان باسمي ايه الحلاوه دي الموضوع كان صعب مش عارف ليه كل ما انوي اعمل مدونه الاقي مصاعب مره الجهاز يهنج ومره اكتب الباسورد و الايميل و ابقي ميه ميه واقول خلاص حبقي مدون قد الدنيا محدش يعبرني و اسال ياجماعه ازاي الموضوع ده يقول مافيش اسهل من كده المهم اخيرا انفكت عقدتي التدوينيه و بقيت مدون يا فرحت ابويا و امي المهم بعد مابقيت مدون اعمل ايه يالا بقي اشتم في الحكومه و العن سالسفيل امها علي اللي عاملها فينا وادعو لاضراب 30 فبراير كل سنه و امن الدوله تحقق معايا و ابقي بطل شعبي و ازودها حبتين واقول لا للتوريث و نعم للتهيص وشويه كفايه علي شويه حقوق انسان علي حبه جنان و النظام الحمد لله عندنا مفيش احسن من كده بدون مخ و يمكن ربنا يكرمني واخش السجن و ابقي زميل الحاج ايمن نور و بعد مااطلع اكتب مذكراتي و اقول و اعيد زي معلمين الستينات ولا العن و اسب في الاخوان اللي محدش عارف لهم حاجه هم جامدين ولا خامدين ولا ايه بالظبط ولااعمل من الباشوات و اسب و العن في عبد الناصر و انقلابه العسكري اللي بوظ البلد وجاب عليها علي واطيها و الي احنا فيه دلوقت بسببه ولااعمل فيها قومي عربي وحدوي و اقول و اعيد في الزعيم جمال عبد الناصر ولا ساداتي واعيد و ازيد علي النظره المستقبليه للسادات و حرب اكتوبر و الحريات و افرم افرم يا سادات ولا ابقي سلفي و البس جلبيه قصيره و اربي دقني واعمل فيها شيخ المهم الساحه واسعه و الملعب كبير بس للاسف مفيش لاعيبه بجد الكل بيتفرج مستنين الكابتن لحد ماحد ينزل الملعب كلنا لازم نشجع الكابتن المخضرم محمد حسني مبارك و ولده وولد ولده ... الخ وراس الحربه القصير المكير احمد عز الذي امتعنا باهدافه الجميله الموثرهو علي ذكر الاعب احمد عز لا ننسي هدفه الموثر في الدخيله للحديد و الصلب و لا هدفه الجميل جدا جدا شاهيناز النجار فالي الامام يا لاعيب